Mos lanza concurso de debuxo para fomentar a igualdade e o respecto entre a mocidade

O Concello de Mos convoca o concurso de debuxo “Pinta a Igualdade coas Cores do Respecto”, dirixido a mozos e mozas de 12 a 17 anos. A iniciativa busca promover valores de igualdade, respecto e inclusión a través da expresión artística, animando á mocidade a reflexionar sobre a diversidade e a loitar contra a LGTBIfobia e os discursos de odio.

Os traballos, que poderán empregar calquera técnica artística en formato A3, deberán presentarse antes do 30 de xuño. Un xurado valorará a orixinalidade, adecuación á temática e calidade técnica das obras. Establecéronse tres premios que inclúen vales de compra, material de papelería e bonos para a piscina, ademais dun agasallo para todas as participantes.

A entrega de premios e a inauguración dunha exposición cos debuxos presentados terán lugar o 3 de xullo. A mostra poderá visitarse ata o 17 de xullo. O Concello de Mos reafirma así o seu compromiso coa educación en valores e a construción dunha sociedade máis xusta e inclusiva.